احمد نگر ضلع اردو ساھیتہ پریشد کی جانب سے منائے گئے اُردو عشرہ کے سلسلے میں آج ضلع پریشد اُردو پرائمری اسکول سونئی 4 میں شاندار تقریبِ تقسیمِ اسناد کا انعقاد کیا گیا۔ پروگرام میں اساتذہ، سرپرستوں اور گاؤں کے معزز ذمہ داران کی بڑی تعداد نے شرکت کی جس میں نوشاد بھائی، سید نور بھائی، اکبر بھائی، ایاز (لالا بھائی)، ارباز بھائی،مولانہ سلیم،شوکت بھائی سمیت دیگر معزز شخصیات موجود تھیں۔ پروگرام کا آغاز ناظمہ باجی نے اپنے مؤثر کلمات سے کیا اور حاضرین کو اُردو عشرہ کی اہمیت و اغراض و مقاصد سے آگاہ کیا۔
اس موقع پر نمایاں کارکردگی دکھانے والے طلباء نے اپنے خوبصورت اشعار، نظمیں، حمد اور نعت پیش کر کے حاضرین سے داد و تحسین حاصل کی۔ طلباء کی پُراثر آواز اور اعتماد نے محفل کو روح پرور بنا دیا۔ آخر میں مہمانانِ خصوصی کے ہاتھوں کامیاب طلباء میں سرٹیفکیٹس تقسیم کیے گئے۔
اس موقع پر نوشاد بھائی نے کہا کہ زبان کسی بھی قوم کی پہچان ہوتی ہے۔ اگر ہم اپنی زبان سے محبت کریں گے، اسے سیکھیں گے، پڑھیں گے اور آگے بڑھائیں گے تو یقیناً ہمارا مستقبل روشن ہوگا۔ اُردو ہمیں اخلاق، ادب اور احترام کا درس دیتی ہے۔
آج جن طلباء نے اشعار، نظمیں، حمد اور نعت پیش کیں، وہ قابلِ مبارکباد ہیں۔ آپ سب نے یہ ثابت کیا کہ اگر محنت اور لگن ہو تو کامیابی ضرور ملتی ہے۔ اور تمام کامیاب طلباء، ان کے والدین اور اساتذہ کو دل کی گہرائیوں سے مبارکباد پیش کی ۔
تقریب خوشگوار ماحول میں اختتام پذیر ہوئی۔
Post a Comment