मख़दूम समाचार
अहमदनगर (प्रतिनिधी) २८.६.२०२३
ब्रिटीशांनी छत्रपती चौथे शिवाजी महाराजांचा अहमदनगरच्या किल्ल्यात कपटाने खून केला; त्यानंतर अतिशय कठीण काळात छत्रपती शाहू महाराज गादीवर आले. शाहू महाराजांनी न डगमगता पहिल्यांदा शिक्षण, अस्पृश्यता निवारण, स्त्रियांचे प्रश्न, शेती आणि उद्योग या क्षेत्राकडे बहुमोल योगदान दिले. यासाठी स्वताच्या राज्याचा खजिना उपलब्ध करून दिला.आरक्षणाचा पहिला अध्यादेश काढून उपेक्षितांना शिक्षण आणि नोकरीत सामावून घेतले. ग्रंथालयांची मोठी चळवळ उभी केली. शेकडो शाळा महाविद्यालयाला आर्थिक मदत दिली. शेतीला पाणी मिळावे यासाठी राधानगरी धरणाचे काम सुरू केले सोबतच व्यापार उद्योग वाढीसाठी सुत गिरणी, कारखाने उभारले. मागासवर्गीय पैलवानांना सरदार तालीम उभारली. सांस्कृतिक दहशतवाद मोडीत काढून समतेचा आग्रह धरणारे थोर युगपुरुष छत्रपती शाहू महाराज जगात ब्रिटिश साम्राज्य मोठ्या उंचीवर असताना देखील भारताच्या आधुनिकतेची पाया भरणी करणारे पहिले राज्यकर्ते ठरले,असे प्रतिपादन कोल्हापूर जिल्ह्यातील जयसिंगपूर कॉलेजचे प्राचार्य डॉ. राजेंद्र कुंभार यांनी छत्रपती चौथे शिवाजी महाराज स्मारक येथे स्मारक समिती आणि स्मायलिंग अस्मिता कष्टकरी शेतकरी विद्यार्थी संघटना आयोजित छत्रपती शाहू महाराज जयंती कार्यक्रमास केले.
दरम्यान डॉ. कुंभार यांनी छत्रपती चौथे शिवाजी महाराज स्मारक समितीच्या माध्यमातून होत असलेल्या अभ्यासिकेला तब्बल २० हजार रुपयांची पुस्तके देत आहे असे जाहीर केले. यावेळी उपस्थित असलेले शाहूप्रेमी अमोल गाडे म्हणाले की छत्रपती शाहू महाराजांचे आणि अहमदनगरचे ऋणानुबंध फार घट्ट होते. त्यांनी अहमदनगरला भेटी दिल्या. मराठा बोर्डिंग सोबतच अहमदनगर जिल्हा मराठा विद्या प्रसारक समाज संस्थेच्या उभारणीसाठी मोठी आर्थिक मदत केली.त्यांचे वंशज संभाजीराजे छत्रपती यांनी देखील अहमदनगरच्या शेतक-यांच्या मुलांसाठी ग्रंथालय व्हावे यासाठी भरीव निधी देत हे ऋणानुबंध जपले आहेत.
कार्यक्रमाच्या प्रास्ताविकात स्मायलिंग अस्मिता कष्टकरी शेतकरी विद्यार्थी संघटनेचे कार्याध्यक्ष यशवंत तोडमल म्हणाले की खाजगी इंग्रजी माध्यमाच्या शाळेत शाहू महाराज जयंती होत नाही त्यामुळे नव्या पिढीला छत्रपती शाहू महाराज कळले पाहिजे यासाठी आम्ही प्रयत्न करणार आहोत. राज्य सरकारने सुध्दा याबाबत कठोर परिश्रम घेतले पाहिजेत. कार्यक्रमाचे आभार प्रदर्शन जैद शेख यांनी केले कार्यक्रमाला बांधकाम व्यावसायिक धीरज कुमटकर, अजय शिंदे, अजिंक्य पवार, स्वप्निल लोखंडे, विशाल पवार आदींसह शाहूप्रेमी मोठ्या संख्येने उपस्थित होते.
Post a Comment