मख़दूम समाचार
मुंबई (प्रतिनिधी) ४.१०.२०२३
मराठी रंगभूमीच्या इतिहासात कधी झाला नाही असा वाद सध्या सुरू झालेला आहे. ‘मी नथुराम गोडसे बोलतोय’ या वादग्रस्त नाटकाच्या शिर्षकासह संहिता ढापल्याचा आरोप मूळ नाटकाचे निर्माते उदय धुरत यांनी केला आहे. त्यांनी हा आरोप वादग्रस्त नट शरद पोंक्षे याच्यावर केला.
ज्येष्ठ नाटककार प्रदीप दळवी लिखित ‘मी नथुराम गोडसे बोलतोय’ हे नाटक नाट्यनिर्माते उदय धुरत यांनी १० जुलै १९९८ रोजी माऊली प्रॉडक्शनच्यावतीने रंगभूमीवर आणले. या नाटकाचे दिग्दर्शन लोकप्रिय अभिनेते दिग्दर्शक विनय आपटे यांनी केले होते. शरद पोंक्षे याला त्यात नथुरामची भूमिका साकारण्याची संधी मिळाली होती. त्याने केलेली भूमिका लोकप्रिय ठरली होती. गांधीद्वेषाने वादग्रस्त ठरल्यामुळे हे नाटक चर्चेत होते. नाटकाचे ८१६ प्रयोग झाल्यानंतर २०१६ मध्ये निर्माते धुरत यांनी हे नाटक थांबविण्याचा निर्णय घेतला होता.
नाट्यनिर्माते धुरत ‘मी नथुराम गोडसे बोलतोय’ हे नाटक आता पुन्हा रंगभूमीवर घेऊन येत आहेत. विवेक आपटे याचे दिग्दर्शन करीत असून, त्याच्या तालमी ३ ऑक्टोबरपासून सुरू होत आहेत. ‘नथुराम’च्या भूमिकेत अभिनेता सौरभ गोखले दिसणार आहे. हे नाटक ऑक्टोबरमध्ये येणार असल्याची जाहिरात जुलैमध्ये वर्तमानत्रांमध्ये प्रसिद्ध झाली होती. ‘नथुरामच्या भूमिकेतील कलाकाराचे नाव निश्चित झाल्यानंतर आता नाटकाच्या तालमी सुरू होत आहेत. नोव्हेंबरमध्ये हे नाटक रंगभूमीवर येईल’, असे दिग्दर्शक विवेक आपटेंनी सांगितले.
आमच्या माऊली प्रॉडक्शन्सची जाहिरात पाहून शरद पोंक्षे यानेसुध्दा ‘नथुराम गोडसे बोलतोय’ या नाटकाची लेखक दिग्दर्शकाचे नाव नसलेली जाहिरात ता. १५ ऑगस्ट २०२३ रोजी प्रसिद्ध केली. पोंक्षे या नाटकात प्रमुख भूमिकेत असून, नाटकाचे ५० प्रयोग होणार असल्याचे त्याने जाहीर केले आहे. ‘एवढ्या मोठ्या कलाकाराला एका ज्येष्ठ नाटककाराच्या संहितेची – शीर्षकाची गरज का भासली? नाटकाच्या संहिता – शीर्षकावरून न्यायालयीन लढाई होईल’, असे धुरत यांनी आयोजित केलेल्या पत्रकार परिषदेत सांगितले. या संदर्भात धुरत यांच्याकडून पोंक्षे यांना आतापर्यंत तीन नोटिसा पाठविण्यात आल्या असून शेवटच्या नोटीसची मुदत ७२ तासांची आहे. या पत्रकार परिषदेत कायदेशीर माहिती जेष्ठ वकील ए. एल. गोरे यांनी दिली.
नव्याने रंगभूमीवर येत असलेल्या ‘नथुराम’च्या भूमिकेचे आव्हान कोण पेलणार याविषयी नाट्यरसिकांना उत्सुकता होती. या भूमिकेसाठी २५/३० कलाकारांच्या ऑडिशन्स घेण्यात आल्यानंतर सौरभ गोखलेची निवड करण्यात आली. ही आव्हानात्मक भूमिका सौरभ कशी साकारणार याकडे नाट्यरसिकांचे लक्ष आहे.
Post a Comment